European champion Manchester City chu Nicolo Barella ngaihventu zingah an tel thar ve leh ta a, Inter chuan an midfielder manah hian £50 million vel an chhiar nia report a ni.
Italian midfielder hian kuminah ngaihventu a nei nual a, a bikin Premier League club lam thawm a ring hle. Liverpool leh Newcastle United te chu Barella nena sawizawm lo ni tawh in tunah City an rawn lang ve leh ta.
Reds hian an midfield lai thawmtha turin MacAllister leh Szoboszlai te lalut tawh mahse an midfielder Milner, Keita leh Chamberlain te chuan a thlawnin Anfield an chhuahsan a, tunah lah midfielder dang pahnih Fabinho leh Henderson te chu Saudi lam pan tura ngaih te anni ve leh bawk.
Hetiang anih tâkah chuan Reds in midfielder thar an lak belh leh ngei a ngai dawn niin a lang a, tun dinhmunah Barella chu Liverpool midfield lâkluh tum zingah a tel.
Newcastle United pawhin €70 million seng in Sandre Tonali chu AC Milan atangin lalut tawh mahse Barella hi an la beisei cheu nia sawi a ni a, thawkkhat lai khan an inrem deuh titih hman anih kha.
Tin, Man City pawhin Ilkay Gundogan an chân hnuin an midfielder tha dang Bernardo Silva chân leh thei anni a, Portuguese international hi Barcelona leh Paris Saint Germain te’n lâkluh an tum mêk. Treble winner City chuan Silva hi an chân anih chuan a thlâktu turin Barella lâkluh an tum dawn tih Calciomercato web chuan a tarlang.
Kum 26 a upa Italian international hi season hmasa a Inter Milan player pawimawh ber te zînga mi niin a team tan inelna hrang hrangah game 52 a inlan a, goal 9 leh assist vawi 9 a thawkchhuak.
