Premier League match ah Arsenal leh Manchester City te chu Emirates Stadium ah an innuai a, mikhual lam hian 3-1 a hnehna chang in point 3 hrawl tak an hlawhchhuak a, table chung berah an kai chho ta chiah bawk.
Cityzens lam atangin De Bruyne, Grealish leh Erling Haaland te’n goal an khung a, Arsenal lam atangin Saka chuan Nketiah penalty hlawhchhuah chu goal ah a chantir ve bawk.
Inkhel pumpui ah Arsenal in 64% lai ball an chang a, shot pawh vawi 10 lai nei mahse goal zawna kal (on target) erawh vawi 1 chauh a awm thung. City lam hian Arsenal lakah shot vawi 9 an nei a, goal zawna kal chu tum 6 lai a ni.
Arsenal hian Premier League match ah City chu a zawnin tum 11 lai an hnehlo tawh a, an history-a league a an hnehloh zawn rei ber chu City anni!
Champion tura rinkai Arsenal hi tun hnai tê ah beisei an pha lo chho a, an game hnuhnung 4 ah vawi 3 ngawt tlawm in tum khat draw result an nei.
Pep Guardiola leh Mikel Arteta te hi an inhmachhawn hnuhnung vawi 9 (all competition) ah Pep hian vawi 8 ngawt mai hnehna a chang thei a, Arteta hi vawi 1 a chak ve thung. A pu hlui Pep Guardiola lakah Mikel Arteta a la nau hret.
Arsenal laka goal khat khungtu Erling Haaland chuan tun season ah league goal 26 a khung tling der tawh a, City player atanga season khata league goal khung tam ber Sergio Aguero record anih rual chiah. Sergio Aguero hian 2014-15 season khan City tan league goal 26 a khung a ni.
De Bruyne chuan season kal mêk ah Haaland hi league ah vawi 6 lai mai a assist tawh a, anni pahnih aia in assist hnem hi an awm lo. An inman hle a, an khingpuite tan chuan an tawrhhlelhawm narawh e!
£100 million a Manchester City zawmtu Jack Grealish chuan tun season ah City tan league game 17 a inlan atangin goal 3 leh assist vawi 3 a thawkchhuak ve tawh bawk.
City hian khelh 23 atangin point 51 an hlawhchhuak a, table chung ber an luah mêk. Arsenal lam hian khelh 22 atangin point 51 hlawhchhuak ve tawh tho mahse City aiin goal difference an nei tlem zawk thung.