Eden Hazard’an season thar lo awm tur atan Real Madrid a chhuahsan dawn niin thuthang a awm a, hemi chungchangah Eden Hazard chuan a hmalam hun chungchang a sawi.
Belgian star Eden Hazard hi Spanish khawpuiah hian season 2 hun a hmang tawh a, season khatna aiin a che thalo, hliam hrang hrang a neih thin avangin La Liga match 14 ah chiah a inlan thei a ni.
Santiago Bernabeu-ah season 2 chiah awm rih mahse, Eden Hazard chu chhuak tur anga sawi a ni. An sawi zel danah Jose Mourinho chuan Hazard hi AS Roma lamah lak luh a tum dawn niin an sawi.
Mahse, kum 30 a upa Eden Hazard hian UEFA European Champions vawi 13 lai lo ni tawh Real Madrid hi chhuahsan tumna a la neih loh thu a sawi.
“Real Madrid atanga chhuah tumna ka la nei lo.” tiin Eden Hazard chuan a sawi niin Goal in an tarlang.
“Real Madrid-ah hian kum 3 daih contract ka la nei rih a, 100% a ka fit tak tak hunah chuan, team-ah hian thil tamtak ka ti ngei ang. Tihtur ka neih te ka hria.”
“Tunah chuan Euros-ah ka rilru ka la thlurbing a, hemi hnu hian Real Madrid tan thil ropui tak ka tih sak ngei ang.” tiin Eden Hazard chuan a hmalam hun a sawi.
Source SL