Argentina midfielder Enzo Fernandez chuan ram tana a khelhpui Paulo Dybala chuan Premier League lam pana Chelsea zawm ve turin a duh.
Tun hnaiah Chelsea leh Dybala te sawizawm an hlawh viau a, Argentina head coach Mauricio Pochettino chuan a hnampuipa hi Chelsea tana khel turin a duh a, a release clause £10 million pawh pektlak an inhuam hle nia report a ni.
Brazilian defender Thiago Silva chuan Dybala hi hmaichhanah ngei a lo titi pui tawh a, transfer chungchang te sawipuiin Chelsea zawm tumna a nei em tih te a zawt hial. Silva hian Dybala chu Chelsea tana signing tha tak anih tur thu a sawi nghe nghe.
Tunah hei Chelsea star dang Fernandez chuan Dybala hi Chelsea lama insuan turin a thlem leh mek a, insawm hlawhtling thei tak ang maw.
Fernandez chuan, “A lo kal ngei ka beisei a ni. Ka titi pui tawh a, Chelsea lama ka nghah thu leh a lo kal anih chuan barbecue emaw thil dang tih pui ka duh thu ka hrilh. Heng thil tih pui tur thian hi ka mamawh a ni” a ti.
Chelsea nena sawizawm hlawh viau mahse Dybala chuan tun hnai mai khan AS Roma ah a hlim thu a sawi a, pre season training an tan hnai thu thlengin a sawi tel.
Kum 29 a upa Juventus forward hlui hian Rome khawpuiah kum 2025 June thla thleng contract a la nei a, Blues in an lalut duh takzet anih chuan mimal inremna an neihpui hmasak phawt a ngai ang.