Brighton & Hove Albion midfielder Moses Caicedo chuan Chelsea a zawm chak hle a, an sawmna chu ‘aih’ tia a chhan theihloh tur thu a sawi.
Chelsea hian Caicedo lakluh tumin tan an la mek a, Ecuadorian international transfer chungchangah Brighton lam nen indawrna kal pui mek in an duh ang in erawh hma an sawn thei mai lo.
Chelsea hian Caicedo manah £75 million vel an theh chhuah ngam laiin Brighton lamin erawh an midfielder thangduang tak manah hian £100 million an phut thung!
Caicedo hi kumin January transfer bazar lai khan Arsenal chuan lakluh tumin theihtawp an lo chhuah tawh a, a manah £70 million lai theh chhuak ngam mahse Seagulls lam hian £70 million lakluh aiin Caicedo la kawl chhunzawm an thlang.
Kumin nipui bazarah Arsenal elpui Chelsea an rawn che ve leh a, Caicedo lakluh tumin thawm pawh an rawn nei lian tan hle. Brighton lam hian club a kum 2027 thleng contract la neitu manah hian £100 million an phut a, Chelsea lamin petlak an inhuam chuan an player duh tak hi an lalut thei ang.
Caicedo hian Chelsea zawm a hreh lo nasa a, hetiang hian Chelsea chungchang a sawichhuak,”Chelsea hi club lian tak a ni a, chu chu thu dik a ni. Sulhnu ropui tak nei club a ni a, an sawmna hi ‘aih’ tih chuan ka chhang thei lovang. Team tha tak anni a, an khawpui pawh a mawi narawh e” a ti.
Caicedo hian January 2021 khan £4.5 million in Brighton hi a zawm a, tun hnai kuma Premier League player thangduang ber te zinga mi niin club lian zawk te awhrawn a ni mek. Seagulls lam chuan an midfielder kum 21 a upa hi la chelh hram an duh a, an hralhchhuah dawn anih pawhin a hralhna manah £100 million hmuh an duh.