Chelsea manager thar Potter a phur

Chelsea a Thomas Tuchel thlaktu Graham Potter chuan Chelsea a enkawl thei dawn avangin a inchhuang a, a phur tawh hle. English manager hian Stamford Bridge ah kum 5 daih tur contract a ziak a, Chelsea neitu thar nen ruahmanna mumal tak an nei ni ngei pawh in a lang.

Chelsea in an game leh a Fulham an hmachhawn hunah Potter hian a nau thar te a ho thei ngei dawn niin a lang a, amaherawchu Queen Elizabeth II boralna avangin an game khelh tur hi sawn hlat a ni maithei bawk.

Chelsea in Thomas Tuchel an ban hnuin manager thenkhat Mauricio Pochettino, Ruben Amorim leh Zinedine Zidane te nena sawizawm ni ve bawk mahse Graham Potter an duh tih a chiang a, kum 47 a upa manager lakluh nan hun an seng tam lo. Blues hian Graham Potter manah Brighton chu £15 million an pe bawk.

Potter chuan Chelsea manager thar anih avanga a lawm thu sawiin,”He club ka enkawl tur hi ka inchhuang in ka phur tawh hle a, Chelsea hi club ropui tak a ni. Chelsea hotute te leh player tha tak tak he hmuna awm te nena thawhho ka chak tawh em em a, nitin a hma sawn zel leh Chelsea tantute tan pawh a inchhuahna tham nih ngei kan duh. He hun tha min petu Brighton & Hove Albion chungah kan thinlung zawng zawng in lawmthu ka sawi a, an club ka enkawl chhunga kawng engkima min tanpuitu, a bikin Tony Bloom leh player zawng zawng te mai bakah fans te chungah ka lawm takzet” a ti.

Chelsea boss thar Potter hian Brighton a a lo thawhpui assistant Billy Reid, Bjorn Hamberg, Bruno, goalkeeper coach Ben Roberts leh assistant head of recruitment Kyle Macaulay te chu Stamdord Bridge lamah a hruai bawk.

Related Posts

error: Content is protected !!