Chelsea manager hlui Maurizio Sarri chuan January transfer window inhawn hunah Chelsea player 4 lai mai lak luh a duh niin report in a tarlang.
Kan hriat angin Maurizio Sarri hian 2018/19 season khan Chelsea a enkawl a, Europa League final-ah Arsenal hnehin nomawi a chawi pui a ni.
Stamford Bridge a chhuahsan hnu lawkah Juventus a enkawl nghal a, Chelsea lamin amah thlaktu tur atan Frank Lampard an la lut ve nghal.
Italian source II Massaggero in a tarlan dan chuan Chelsea a enkawl laia a player thenkhatte chu Lazio lamah lak luh a duh niin an tarlang.
Summer transfer hnuhnung berah khan Lazio chuan Chelsea player pahnih Ruben Loftus Cheek leh Kepa Arrizabalaga chu lak luh tumin an lo bei tawh a, mahse, Chelsea lam chuan an lo hnar. Mahse, Lazio an beidawng duh mai lo, player pahnih hi lak leh tumin an bei mek. Summer transfer lai tho khan Lazio hian Chelsea forward Pedro erawh an la lut thei hram.
Lazio boss Maurizio Sarri hian a hnuaia che tha tak Callum Hudson Odoi pawh lak luh a duh a, hei mai bakah Lyon lama loan a khel mek Emerson Palmieri pawh hi lak theih ngei an duh.
Lazio hian sum lamah harsatna neuh neuh an tawh ve avangin january transfer a player tamtak lak luh chu an tan thil harsa tak a ni ngei ang. Mahse, an duh ang player erawh an lak theih a rinawm.
Tun season khelh mekah Lazio hi an che tha lem lo hle, Serie A table ah pakuana dinhmun an hauh mek a, Top four a awm nen point 11 lai maiin an inhlat mek. Sarri hian a player hlui thenkhat hi la lut thei ta se hma a sawn pui mai lovang maw?
Source SL