Inter Milan striker Romelu Lukaku chuan a club dik tak Chelsea lam nen an inbiak pawh loh thu a sawichhuak.
Belgium striker hian 2021 khan Inter Milan atangin Chelsea chu £97.5 million in a zawm a, kum 2026 thleng daih tur contract a ziak. A lakah Chelsea fans te beiseina sang hle mahse an beisei a pha lova, Stamford Bridge a season khat chauh hun a hman hnuin loan in Inter Milan a pan leh a ni.
Hliam in a tlakbuak nasat avangin Inter tan tun season ah a inlan tam lo em em a, match 14 chauh a la khel. Nizan khan Inter Milan leh Porto te’n UEFA Champions League Round of 16 1st leg an khel a, mual neitu Inter lam hi 1-0 a hnehna changin he goal lut awmchhun hi Lukaku khung a ni a, tun season a goal 4 a khungna chiah a ni bawk.
Lukaku hian season tha tak a hmang anih chuan Inter lam hian la chelhbeh an tum dawn a, tun anga beisei a phak lova, hliam in a tihbuai chhunzawm zel erawh chuan a loan contract hi pawhsei a ni lovang.
Kum 29 a upa hian Chelsea lama kir leh a rilruk lo niin a lang a, reporter te’n ‘Chelsea lam nen inbiakna in nei thin em?’ tia an zawhna Lukaku chuan chhangin,” Chelsea lam tu nen mah kan inbe ngai lo. Tuna ka dinhmunah hian rilru zawng zawng ka pe a, ka hma hun tur lo ngaituah chiam ka duh lo. Lo suangtawh lawk chiam khan awmzia a nei bawk hek lo.”
Everton leh Man Utd tan pawha lo khel tawh Lukaku chuan sawi chhunzawmin,” Football a pawimawh ber chu tun hun hi a ni a, chuvangin theihtawpa inbuatsaiha kan game leh a tha taka khelh hi ka duh” a ti
