Chelsea boss hlui Frank Lampard chuan kum 4 kalta a Chelsea a enkawl tum khan Declan Rice lâkluh a lo tum tawh thu a sawi.
Chelsea in an head coach atanga Maurizio Sarri an ban hnuin an legend Frank Lampard an lalut a, hetih hunlai hian Chelsea chu player thar lalut thei lo tura hrem anni a, he an hremna hi transfer window hnih chhung kalpui a ni. Player thar an lâkluh theih tâk lo ah chuan Lampard hian first team a khel tur academy player thenkhat ko a, Reece James leh Mason Mount te ho hming chher tanna kha a ni.
Kumkhat chhung player thar lalut thei lo tura hrem annih hnuin Chelsea chuan player thar an chawlut leh thei a, Lampard chuan a squad tichak turin Ben Chilwell, Kai Havertz, Christian Pulisic te ho a sign anih kha. Hemi tum hian Lampard chuan Chelsea academy player hlui Rice lâkluh a lo tum tawh The Diary CEO podcast kaltlangin a sawichhuak.
Lampard chuan, “Chelsea a ka awm hmasak khan Rice lâkluh ka lo tum tawh. He nau hi kum 10 chhung chu Chelsea captain ni thei tur anih hi ka ti rilru hial a! Engpawhnise a thleng ta lo a nih hi” tiin Steven Bartlett a hrilh.
Chelsea hi tun nipui bazar khan Declan Rice lâkluh tumtu zingah an tel ngei a, anni bakah Manchester City leh Bayern Munich te pawhin an ngaihven.
A tawpah erawh kum 24 a upa mana ngam huai ber Arsenal in an lalut fel thei dawn a, Gunners chuan English international manah hian £105 million an theh chhuak ang. Rice hian Arsenal ah medical test a nei fel tawh a, a transfer hi official a puan thuai a ni ang.