Sky Sports pundit Gary Neville chuan pressure nasa tak hnuaia awm mek Graham Potter chu Chelsea lamin la ring chhunzawm zel se a duh.
Chelsea chuan January transfer window chhung ringawt khan player thar lakluh nan £ 300 million dawn an thehchhuak a, Premier League record fee £106 million chu Benfica atanga Enzo Fernandez an leichhuahna man a ni. Argentine midfielder mai bakah Blues hian Mykhaylo Mudryk manah £89 million an inseng a, Atletico Madrid atangin Joao Felix chu to takin an hawh bawk.
Todd Boehly hnuaiah sum thahnem tak hmang ral tawh mahse Chelsea in tlakhniam lam an pan tial tial emaw tih mai tur a ni a, point 31 nen league table ah 10-na anni mek a, tun hnai an game hnuhnung 10 ah tum khat chiah hnehna an chang bawk.
Blues in Graham Potter hnuaiah season duhawm lo tak hmang mek mahse Man Utd captain hlui Gary Neville erawh in English manager lakah Chelsea lamin an rinna la nghat chhunzawm se a duh.
Neville chuan,”Potter hi pressure nasa tak hnuaiah a awm mek a, chu chu a hmel atang pawhin a hriat theih. 2nd half a an chance hlah zo zai (vs Southampton) te leh inkhelh banah fans te’n an booo khum kha thil vanduaithlak tak a ni.”
”Chelsea neitu te hian thil dik tih an duh ngei in ka ring. Nikum lam khan season tir te ah Thomas Tuchel an ban a, manager thar an lalut. A puibawm turin assistant tha tak tak an lo lut bawk a, Chelsea hian Graham Potter lakah an inseng nasa hle. Chuvangin tuna an dimhmun harsa tak hi an paltlang theihnan Chelsea hian Potter lakah rinna nghat ngam rawh se. Tun hi inenfiahna hun tha tak pawh a ni mahna” a ti.
Chelsea hian tun season ah league point 31 chauh an la khawl a, table chung bera awm Arsenal chu point 23 laiin an pha tawh lo. An game leh ah Tottenham Hostpur an luhkhung dawn a, game harsa tak an beisei a tul dawn.