Chelsea chuan kumin nipui bazarah Harry Maguire lâkluh an tum lova, an academy graduate Crystal Palace tana khel mêk Marc Guehi lam an hawi thung ang.
Maguire hi ni tlemtê liamta mai khan Erik Ten Hag chuan a captain nihna a hlip a, Red Devils in an defender hi hralhchhuah mai an pawi ti lo bawk.
Chelsea chuan khup hliam avanga Wesley Fofana chu hun rei tak an chhawr theih dawn loh avangin centre back thar lâkluh tur an zawng mêk a, Blues leh Maguire te sawizawm ni hman mahse Guardian chuan Chelsea in Magure lâkluh an tum loh thu leh tuna an defender top target chu Marc Guehi anih thu a tarlang.
Kum 23 a upa English centre back hi Chelsea academy graduate niin kum hnih liamta khan Stamford Bridge chhuahsanin Crystal Palace lam a pan a, Selhurst Park ah hian season thum dang contract a la nei. Chelsea hian an academy graduate Guehi hi an lakir duh anih chuan sum tam an insên a ngai ang.
Hetih mêk lai hian Maguire chuan a hma hun zel tur a tihfel thuai a ngai a, Man Utd ah thlauhthlak anih avangin atan club dang zawm a finthlâk ang.
Maguire hian duhtu a nei nual niin a lang a, a buaithlak lai ber erawh a hlawh tam tak leh a transfer fee a ni. 2018 khan kum 30 a upa defender hian Leicester City atangin £80 million in Man Utd a zawm a, khawvela defender man to ber record a siam.
Amaherawhchu Maguire hian Man Utd ah beisei a phâk thei mawlh lova, Erik Ten Hag lo luh hnu phei chuan bench ah a hun tam zawk a hmang. Red Devils chuan an defender hi hralhchhuah an pawi ti lova, chutihrualin a manah £50 million an phut avangin club dang tan Maguire lâkluh mai hi thil awlsam a nilo. Loan-a hawh an dilna lah Man Utd lamin an lo pawm duh mai bik lova, English defender hma hun zel tur hi tun thlengin a la chiang thei rih lo a ni.
