Centre forward thar zawng mek Chelsea chuan Arsenal striker Folarin Balogun agent an be pawp a, transfer chungchang an sawi pui.
Kum 22 a upa Balogun hi season hman zawh takah khan a che tha hle a, Ligue 1 club Reims tan league game 37 a inlan atangin goal 21 leh assist vawi 2 a thawkchhuak.
New York a piang striker hian ram lamah pawh England aiah USA tana inlan tawh turin thutlukna siam fel a, thla hmasa khan CONCACAF Nations League final ah Canada lakah USA tana a goal hmasa ber khungin a team chu 2-0 a hnehna a chanpui a, nomawi an chawi zui bawk.
Season hmasa lama club leh ram tana a chet that em avangin European club lian te awhrawn a ni mek a, tun dinhmunah AC Milan, Inter Milan, Marseille, Monaco, RB Leipzig leh tunah Chelsea te chu Balogun ngaihven mek tute anni.
USMNT striker hian London a kir leh na hun remchang a nei thei dawn a, Chelsea chuan amah hi ngaihven mek in a transfer chungchangah a agent an be pawp tawh tih Football Transfer chuan a tarlang.
Arsenal in striker Gabriel Jesus leh Eddie Nketiah te an kawl miau avangin an striker beiseiawm tak Balogun hi lâkkir leh tumna an nei lem lova, kuminah a player duh dan ang ngei a hralhchhuah chu an thil tum a ni a, chutihrual chuan a manah €58 million an chhiar.
Balogun hian kum 7 mi lek anih atangin Arsenal hi a zawm tawh a, chutihrualin Gunners first team tan tun thlengin game 10 chauh a la khel thung. 2021/22 season khan loan in Middlesbrough a zawm a, season hmasa khan Ligue 1 club Reims a zawm leh bawk.
Chelsea in season hman zawh taka goal khung an harsat zia kan hria a, season hmasa khan Blues aia goal khung tlem Premier League team 3 chauh an awm! Chuta chhapah Blues hian season hmasaa an top scorer Kai Havertz chu an hmelma club Arsenal lamah an chan bawk.
Kai Havertz chan mahse Blues hian an hmatawng lam an ngai pawimawh tih a hriat a, RB Leipzig atanga French striker Christopher Nkunku an sign tawh bakah Villareal atangin forward beiseiawm Nicklas Jackson an lalut leh tawh bawk. Pochettino an Lukaku chu Chelsea player anih anga pre season training nei tura a lo in report ngei a beisei thu a sawi tawh a, tunah lah season hmasa a Ligue 1 lama goal khung thei tak Balogun an dawr leh mek bawk.