Chelsea chuan FC Barcelona midfielder Gavi lak luh tumin an inpeih tawh niin Spanish outlet pakhat El Nacional chuan a tarlang.
Gavi hi La Masia youth system atanga rawn chawr chhuak niin, kum 17 a upa chauh ala ni a, pre-season ah Barcelona tan a chet that em avangin first team-ah a lut nghal a ni. A kum hi la naupang rih viau mahse, regular takin first team tan a khel chhuak tawh, tun season khelh mekah match 11 lai mai a inlan der tawh.
Hetihlai hian FC Barcelona pawhin rawlthar talent nei tha tak an chan mai hi an hlau ve ang reng a, tunah hian kum 17 a upa contract thar tur chungchang an ngaihtuah mek niin an tarlang. Barcelona hian Gavi hnenah hunrei tak chhung atan contract pek an duh a, an pe thei a nih chuan a release claus neih hi €1 billion lai a tling thei dawn a ni.
Premiere League table-a hmahruaitu Chelsea hian an midfield lam tih chak an duh. Atletico Madrid atang loan a an lak luh Saul Niguez hi Thomas Tuchel hnuaiah beisei a pha vak lova, hetihlai hian N’Golo Kante leh Jorginho hi an naupang zawkzawk tawh lo. Gavi mai bakah hian AS Monaco star Aurelien Tchouameni pawh Stamford Bridge lama lut tur angin sawi a ni bawk.
Gavi hi club tan mai ni lo a ram Spain tan pawh a che tha ang reng hle. 2022 FIFA World Cup final squad-ah pawh awm ngei tura rinkai a ni mek. An khelh tawh chinah Gavi hi Spanish national team tan match 4 lai a inlan tawh a ni.
Chelsea leh FC Barcelona hian rawlthar talent nei tha tak tak an chher chhuak tam.
Chelsea leh FC Barcelona te hian academies an nei tha a, rawlthar talent nei tha tak tak an chher chhuak nual a ni.
La Masia academy atang hian football tha tak tak an chhuak nual tawh a, Barcelona academy atang hian Lionel Messi, Xavi, Andres Iniesta, Sergio Busquets leh Jordi Alba te hi chhuak hmasa lar tak tak te anni, tunlai vela chhuakah chuan Ansu Fati, Gavi, Nico Gonzalez leh Riqui Puig te hi lar deuh chu anni.
Chutiang bawkin Chelsea pawhin youth system ah hlawhtlinna an chang tha hle. Tun hnai velah player tha an chher chhuak nual, Mason Mount, Reece James, Tammy Abraham, Billy Gilmour, Valentino Livramento leh Conor Gallagher te hi player tha an chher chhuah langsar deuh te chu anni. Hudson odoi pawh hi chelsea in an chhawr tan der tawh.
Source SL