Premiere League club Chelsea chuan tun summer transfer window-ah FC Barcelona forward Antoine Griezmann chu lak luh an duh niin report in a tarlang. Frenchman hi FC Barcelona chhuahsan tur zingah a langsar hle. Barcelona hian player te hlawh tih hniam sak an tum niin an sawi bawk.
SPORT in a tarlan dan chuan Antoine Griezmann hi Atletico Madrid lama kir leh duh angin an sawi a, mahse, Barcelona lam hian La Liga lama an elpui ber pakhat Atletico Madrid hnenah hian offer an pek an tum lem lo niin a tarlang. Chelsea hi amah la tur zingah an langsar hle, Chelsea boss Thomas Tuchel chuan tun summer chhung ngeiin Chelsea attacking line thuam that a tum ve bawk.
Atletico Madrid hian Barcelona hnenah Saul chu Griezmann nen inthleng turin swap deal neih pui an tum a, mahse, Barcelona lam hian an duh a rinawm lo.
Chelsea hi Griezmann luhna tur atan Barcelona hian an duh a, hetihlai hian Blues lam pawhin 2021-22 season atan Griezmann hi loan in lak luh phawt a, nakum summer transfer window-ah a ngheta lak luh an tum niin an sawi.
Kan hriat angin 2020-21 season ah khan Chelsea hma tlar an chet tha lo hle a, Chelsea lama season khatna chauh hmang mek German striker Timo Werner pawh duh angin a che hlei theilo. Hei vang hian Tuchel hian goal khung thei ve tak striker chu tun summer-ah pakhat tal lak luh a tum.
Griezmann pawh Barcelona tan duh angin a che tha bik lo. 2020-21 season ah khan FC Barcelona tan match 51 a khelh atangin goal 20 a khung. Griezmann hi talent nei tha tak footballer a ni a, Chelsea hian la lut ta se, hmasawnna a hmu thei mai ang em?
Source SK