Chelsea chuan Thawhlehni zanlai khan UEFA Champions League quarter final lut turin German club Borussia Dortmund an hneh anih kha. Kha kha hna awlsam tak a ni hauh lova, a zawna game 11 chhung hnehna chang tawh Dortmund chu Graham Potter team Chelsea in an chak kaltluang lai an titawp!
Blues hi 1st leg ah 1-0 in hnufual zawk mahse second leg match an khel tha a, an khingpuite sinhih faia hnehin UCL khel team la dam 8 zingah an tel.
Chelsea hian an history ah UEFA Champions League tum hnih an chawi tawh a, heng an chawi tum season ah te hian manager inthlak in tun season ah pawh manager thar hnuaiah enge an hlawhchhuah dawn kan hria ang chu.
Chelsea captain hlui Frank Lebouef chuan tun season ah Chelsea team te chu Champions League chawi thei an nih thu hetiang hian a sawi, “Champions League kan chawi hmasak ber tum kha in la theihnghilh lo ang chu maw? Season harsa tak kan hmang a nih kha. Chelsea hian harsatna thuk tak kan tawh tumin Champions League kan chawi nawlh thin. Champions League chawi turin tum hnih lai mai manager kan thlak a ngai. Di Matteo a lo inlan a, kan chawi, Tuchel a lo lang leh a, kan chawi leh, Potter hian an tih ang hi a ti ve thei ang em? Chu erawh ka hre lo” a ti.
Lebouef chuan sawi zel in, ”Chelsea hi tun season ah pawh chawi thei tur anni a, kum hnih liamtaa an chawi tum kha club in hun duhawm lo a tawn lai anih kha. Nimin lam pawhin ka lo sawi tawh a, tuna Chelsea team ah hian talent a awm ngei a, chuvangin an lakah club dang an fimkhur a tul. Mi zawng zawng hian Bayern emaw Real Madrid chu champion tura rinkai niin an ngai a, amaherawhchu Chelsea lam hi theihnghilh hauh lo se ka duh. Tunah chuan an lo kir tak tak tawh niin ka hria a, rei an daih dawn em tih erawh kan hre chho zel ang chu” a ti.
UCL quarter final lut hlim Chelsea hian naktuk zanah Leicester City chu league ah an hmachhawn dawn a, an phur vanglai a ni bawk nen, point 3 hmuh ngei an inbeisei dawn. Graham Potter leh a nau te hian season kal mek ah league game 25 atanga point 34 hlawhchhuak tawh in table ah 10-na anni mek a, top 4 huanga season khar turin an hna a hautak dawn hle.
