”Chelsea ang lo takin Europe inelna ah kan inlan dawn” – De Zerbi

Moses Caicedo transfer chugchangah Brighton & Hove Albion manager Roberto De Zerbi chuan a ngaihdan a sawi a, Caicedo lâkluh tuma theihtawp chhuahtu Chelsea lam a kâp zeuh bawk.

Chelsea chuan kuminah Caicedo hi lâkluh ngei tumin Brighton lam pawh an dawr a, a manah £80 million lai theh chhuah inhuam mahse Seagulls lam erawhin an midfielder thangduang tak manah hian £100 million an phut.

Brighton boss chuan Caicedo hi an chân anih chuan a thlâktu tur player tha tak an lâkluh a ngaih thu a sawi a, a chhan pawh season tharah club hausa Chelsea ang lo taka European inlena-ah an inlan dawn vang a ni.

De Zerbi chuan, “Club neitute rilru a inthlâk hma loh chu Caicedo hi kan hnenah a awm ang. Hma hunah eng nge thleng dawn ka hre hauh lova, mahse Caicedo hi a chhuak anih chuan a thlâktu tura player dik ber kan zawn hmuh a ngai ang. Player tha taka kan thlâk a ngai dawn a, a chhan chu kuminah Chelsea ang lo taka Europa League kan khelh dawn vang a ni” a ti.

Chelsea leh Brighton te hi tukin zinglam khan pre season friendly match ah an inhmachhawn a, De Zerbi nau te inkhel hmuhnawm viau mahse Blues lamin 4-3 in hnehna an chang thung.

Brighton in kuminah an midfielder tha tak Alexis MacAllister chu Liverpool lamah an chân tawh a, Moses Caicedo leh zel chan belh chu an duh hauh in a rinawm loh.

Chutihrualin transfer window inkar hma in eng pawh a la thleng thei a, a player berin Chelsea sawmna a hnar theihloh tur thu a lo sawi tawh avangin Brighton phût zat Chelsea lamin an theh chhuak ngam anih phawt chuan Caicedo hian Stamford Brigde lam a pan ang.