Chelsea star Hakim Ziyech chu season khat chauh Stamford Bridge-ah hun hmang rih mahse, club lamin hralh chhuah an tuma, amah duhtu zingah hian Italy club pahnih an langsar niin report in a tarlang.
Summer transfer hnuhnung berah khan Chelsea chuan Ajax Amsterdam atangin Ziyech hi an la lut a, Chelsea tan all compettion-ah match 39 lai a inlan hman a ni. Mahse, club lam chuan sum tuak nan hman an tum nghal.
Calciomercato tarlan dan chuan Napoli lamin Ziyech hi lak luh an duh a, AC Milan pawhin an player nena inthleng pui an duh ve bawk.
Chelsea tan goal 6 khungin assist vawi 4 nei mahse, Chelsea boss thar Thomas Tuchel hnuaiah a nghet tak tak thei lova, Starting XI pawh a chang tha thei mang meuh lo a ni.
Morocco international hian Premiere League match 15 a start na atangin a quality neih that zia a pholang a, mahse, zawhna awm thei chu Chelsea-ah hian hunrei tak a awm thei ang em tih chu zawhna lian ber a ni.
UEFA Champions League semi final Real Madrid nen an khelh leg 2-ah khan squad-ah a tello hrim hrim a, Porto a final Man City nen an khelh tumah pawh khan squad-ah a tello a ni.
London lamah a hun a tawp hnai tawh niin a lang a, Napoli chu amah la tu tur zingah a tel, Napoli hian an manager thar atan Luciano Spalletti an lak hnuah, Hakim Ziyech chu lak luh a duh niin an tarlang.
AC Milan pawh hi Hakim Ziyech la lut tur zingah rinkai ber pakhat an ni. Sportsmail tarlan dan chuan season thar inpuahchah nan Chelsea hian sum hman tam an tum deuh niin an tarlang a, hei vang hian Ziyech hi an hralh chhuah ngei ngei a ngai dawn niin an tarlang bawk.
Source Sportsmail