Chelsea ah Mason Mount hma hun a chiang lo zel a, contract thar chungchangah club lam nen an la inrem lo niin Daily Mail chuan a tarlang.
English forward hian Stamford Bridge ah kartin £80,000 a hlawh mêk a, contract tharah chuan tuna a hlawh mêk aia let thum a tam hlawh a inbeisei a, heihi club lamin pek an inhuam lo niin a lang.
Chelsea academy chhuak Mount hian club ah thla 18 daih tur bak contract a nei tawh lova, an elpui club Liverpool chuan an ngaihven mêk.
Todd Boehly hnuaiah Chelsea in player thar 16 lai an lalut tawh a, January transfer window liamta ah khan player thar 8 lai an chaw lut bawk. Stamford Bridge ah rawlthar beiseiawm tak tak an kat nuk a, tun hnaia che tha tawk lo Mount pawhin elpui tha tak tak a nei.
Potter an UEFA Champions League round of 16 khel tur squad a player thar Joao Felix, Mykhailo Mudryk leh Enzo Fernandez te a telh avangin Pierre Emerick Aubameyang , Noni Madueke leh Benoit Badiashile te squad-a telh an nilo. Player ngah Blues an inren dawn lova, club a hlim lo chuan hmun dang an pan nal nal thei ang.
2022-23 a club sum insêng hnem ber Chelsea in tun thlengin beisei an la pha lova, player 16 lai lalut tawh mahse league match a an chak zat chu vawi 8 chiah a la ni thung.
Potter leh a nau te hian league game 21 an khelh atangin point 30 chauh an la hlawhchhuak a, table ah 9-na anni mêk. An game leh ah West Ham United an hmachhawn dawn a, point 3 hmuh ngei an tum ang. Fulham nen goal awm lova an inhnehtawk hnuin Graham Potter chuan insiamrem hun an mamawh thu leh fans te chu dawhtheihna nei turin a chah.