Ruben Loftus Cheek chuan Chelsea chhuahsana AC Milan a zawm chhan a sawifiah.
England international hian kumin nipui bazarah Chelsea atangin Serie-A club AC Milan chu €18 million in a zawm fel a, nimin khan a pholanna hun hman a ni bawk.
Loftus Cheek chuan Milan a zawm fel hnuin Chelsea a chhuahsan chhan hetiang hian a sawi, “He club (Chelsea) hi ka hmangaih a, fans te pawh, mahse ka khelh zat leh ka position khelhna te ngaituah in ka lung a awi tehchiam lo. Ka ngaihdan chuan kha aia hun tam zawk pek tur ka ni a, hun tha ka nei ngai meuh lo a ni. Ka taksa dinhmun a tha em em a, tha takin game ka khel ve thin bawk. Chuvang chuan tun hi insawn hun tha tak a ni” a ti.
Kum 27 a upa English midfielder hian season hman zawh takah khan Blues tan inelna hrang hrangah game 33 (starts 22) a inlan a, assist vawi 2 neiin goal erawh a khung lo.
Milan hian Loftus Cheek bakah Chelsea player dang Christian Pulisic an lalut dawn bawk a, Chelsea tana hmun chang tam lo American international hian San Siro a pan thuai dawn.
Loftus Cheek chuan AC Milan zawm ve tur Pulisic chungchang hetiang hian a sawi a, ”Talent a nei ropui a, thahrui a ngah bakah a che rang hle a, goal a khung thei em em bawk. Lockdown lai khan Frank Lampard hnuaiah a che tha em em a, khatiang ang khan a chet leh theih ngei ka beisei. Team (AC Milan) tan chuan min rawn belh tu tha tak a ni ang.”
Kum 24 a upa Pulisic hian season hmasa khan Blues tan inelna hrang hranga game 30 (starts) a inlan atangin goal 1 leh assist vawi 2 a thawkchhuak a, beisei a phak lo hle. Chelsea chuan an player pahnih Ruben Loftus Cheek leh Christian Pulisic te an hralhna atangin €38 million vel an hailut thei dawn a ni.
