Nizan zanlai Premier League inkhelah Chelsea leh Everton te chu Stamford Bridge ah an inhmachhawn a, 2-2 a inhnehtawk in match a tawp a, hun tawp dawna Simms goal in Chelsea chak tluang lai a titawp!
Joao Felix chuan Chelsea hmahruaina goal a khung a, season kal mêka Premier League goal hnih a khung na a ni bawk.
Goal an chhuah hnu pawhin mikhual lam chu an la khel tha fahran lova, amaherawhchu rinloh tak mai in Doucoure chuan an siphurh sût nan a tauh goal. Kai Havertz chuan Doucoure ball tauh hi lo petchhuak mahse ball in goal line a pelh tawh miau avangin goal a pawm a ni.
Chelsea chuan Kai Havertz a penalty goal hmangin 2-1 in hma an hruai leh a, Blues lam hian hnehna an chan ngei pawh a rinawm hle a, a zawna game 4 chak nan minute tlem te bak inven an mamawh tawh lo.
Amaherawhchu Everton lamin thil mak dang an thlentir leh a, hun tawp dawn minute 89 na ah an siphurh an sut leh thei tlat.
Substitution bench atanga dah luh Simms khung niin Koulibaly a tlan pelh hnuah Chelsea goalkeeper Kepa Arrizabalaga dan hman lovin goal ah a pet lut a, a zawna game 3 chhung hnehna chang tawh Chelsea chak kaltluang lai a titawp chiang hle.
Blues in point 3 hmuh theihna hun tha leh table a 9-na nih theihna hun tha an bawhpelh a, league point 38 nen table ah 10 na an la ni chhunzawm zel ta rih. Graham Potter hote tan top 4 huanga season khar turin an game khelh leh tur ah te an chet chhiat a thiang tawh lo!