Anfield a ropui taka an comeback hnuin Real Madrid striker Karim Benzema chuan Champions League trophy dang chawi leh ngei an tum thu a sawi a, Liverpool laka a teammate te khelhdan a fak hle bawk.
Nizan khan season hmasa UCL finalist pahnihte’n Anfield ah UCL Round of 16 first leg match an khel a, mual neitu lam hian 2-0 a hma an hruai zet hnuin mikhual lam hian goal 5 lawih an pe let a, champion lai Real Madrid an comeback chiang hle.
Inkhelh banah Reds laka goal hnih khungtu Benzema chuan Liverpool laka team player te khelhdan a fak a, an nomawi kawllai humhim ngei an tum thu a sawi bawk.
”Inrintawkna nen kan khel a, kan beisei ang ngeiin goal pawh kan khung. Champions League trophy dang chawi leh hi kan thil duh chu a ni” tiin France striker hian a sawichhuak.
Kum 34 a upa chuan sawi chhunzawmin, ”Bul kan tan tha lo hle a, keini pawhin Anfield-a fans te’n pressure nasa tak min pe dawn tih kan hre lawk. Minute 15 hnuah erawh Real Madrid dik tak kan hmu a, keini aiin kan tumpuite’n bul tan tha zawk mahse game pawimawh tak anih avangin engtik hunah pawh kan inpeih at a ni.”
”2-0 a kan hnufual khan goal kan pe let anih chuan game kan thlak hlawk dawn tih kan hria a, kan beisei ang in Vinicius atangin kan hmu ngei bawk. Anfield a kan fans lo kal te hnenah lawmthu ka sawi duh a, anni kha kan player 12 na anni. 2nd leg ah pawh kan mamawh leh dawn a, Bernabeu ah game ropui tak kan chhawpchhuah leh a tul ang” a ti
2nd leg hi March ni 16 zinglam dar 1:30 a khelh a ni dawn a, champion lai Real Madrid hian goal thum an neih lawk bakah an khelmual Santiago Bernabeu ah ngei Reds an lo mikhual dawn a, tuna an dinhmun en in last 8 lut turin hna hautak an nei lem lo.