Champions League lamah tawnhriat la neilo mahse Potter a phur

Chelsea manager thar Graham Potter chuan Chelsea manager anih anga press conference a hmachhawn hmasak ber ah Chelsea manager hna thawk tura a in beisei ngai loh thu a sawi a, tin Champions League lamah tawnhriat la nei hauh lo mahse a phur em em thu a sawi bawk.

Zanin zanlai dar 12:30 ah Blues in Stamford Bridge ah RB Salzburg an lo mikhual dawn a, Chelsea manager thar Graham Potter tan fiahna hmasa a ni dawn. English coach hian a nau te a chetthat pui a tul ang.

Kar hmasa lamah Chelsea in Dinamo Zagreb laka 1-0 a an tlawm hnuin Chelsea chuan German coach Thomas Tuchel an ban a, Brighton atangin Graham Potter an lalut. Club thar enkawl tu Potter a phur tawh hle.

”He club hi kan enfiah a ngai a, a thatna te, an sulhnu te, an thil tum te, Champions League leh Premier League thlenga chawi thei an nihna hian an that zia a phochhuak chiang viau awm e. Brighton ah khan season thum duhawm tak ka hmang ral a, he hmunah erawh chona thar hlak hmachhawn tur ka ni. He club neitute’n ka laka rinna an nghat ngam hi ka lawm hle a, kei pawh in player tha tak tak thawhpui tur ka nei thei dawn a ka hlim tazket. He club tantute’n nuam ti tak leh inchhuang taka an khawsak theihna inkhel mualah theihtawp kan chhuah ang” tiin Blues boss thar Graham Potter an Chelsea tantute tana theihtawp chhuah an tum thu a sawi.

Potter chuan sawi chhunzawmin,” Europa lamah tawnhriat nei tawh mah ila Champions League lama tawnhriat la nei lo ka ni a, mahse he chona thar hmachhawn tur hian ka phur tawh hle. Team tha tak din kan tum a, kan game khelh ah rilru pek ka duh. Ka player tin te hi hriatchian zel a pawimawh” a ti.

Related Posts

error: Content is protected !!