Barcelona manager Xavi Hernandez chuan Champions League hla a hriat apianga a thin a rim thin thu a sawichhuak. Blaugrana hian tun season Champions League ah Bayern Munich leh Inter Milan te hnuaia awm in group stage an khar a, Europa League lam an tlak a ngaih phah.
Xavi enkawlna hnuaiah Barcelona in a kum zawnin Champions League knockout stage an lut tawh lova, naktuk zanlai dar 11;15 PM hian Europa League Round of 16 play off first leg ah Manchester United an hmachhawn ang.
Barca boss Xavi chuan a club enkawl chu engtik lai pawha Champions League khel tur an nih thu a sawi a, Europa League play off a Man Utd an hmachhawn hmaa press conference a hmachhawnna ah hetiang hian tawng a thlah.
Xavi chuan,” In lam atanga Champions League hla ka ngaihthlak apiang hian ka thin a rim thin. Kan history leh tuna kan dinhmun en pawh hian he inelna (Champions League) a la tel tur hi chu kan ni” a ti.
Spanish international hlui chuan sawi chhunzawmin,” Amaherawhchu thil nihna dik tak kan hmachhawn a tul a, team la chuang bang te tana duan he inelna (Europa League) hi a phurawm hle. Europe ah season engmaw zah chhung chu hlawhtlinna kan chang tawh lova, chuvangin he inelna (Europa League) hi kan tan chuan a pawimawh hle. Kan tan chuan chona tha tak a ni a, Europe ah kan tha tawk em tih inenfiahna a ni” a ti.
Barcelona hi league lamah an che tha hle a, game 21 an khelh atanga point 56 lai hlawhchhuak tawh in table chung ber an luah mek a, pahnihna an hian champion lai Real Marid chu khelh 20 atanga point 45 nen an awm ve bawk. League lamah che tha viau mahse Champions League atangin an tla fel hma em em a, Europa League ah erawh team huphurhawm ber te zinga mi anni ngei e.
