Barcelona chuan kumina an pre season game hmasa ber chu tukin zinglam khan khelin Premier League club Arsenal an hmachhawn a, an beisei ang thil an tawng lo! Spanish club ropui hi Mikel Arteta team lakah 5-3 in an tlawm a, pre season bul an tan fuh tehchiam lo.
He match ah hian Arsenal lam atangin Trossard an vawi hnih a khung a, Havertz, Saka leh Vieira te’n goal khat theuh an khung ve bawk. Barcelon lam atanga goal khungtu te chu Lewandowski, Raphinha leh Torres te anni.
Inkhelh banah Barcelona boss Xavi chuan Arsenal lamin friendly match pangngai khel lova, UCL final match ang maia an chet rawva thu a sawi!
Xavi chuan, “Inkhel entute tan chuan match hmuhnawm tak a ni ngei a, coach lam tan erawh a hlauhthawm awm lam hret a ni, foul te kha a tam mah mah. Inkhelh banah an manager (Arteta) hnenah Champions League match ang maia an khelh thu leh an chet dan chu friendly match ang anih loh thu te ka hrilh. Mahse ka hrethiam, tute pawhin hnehna chan kan duh a, keini in kan pre season game hmasa ber kan khelh laiin anni erawh Champions League final ang mai in an rawn che rawva thung” a ti.
An pre season game hmasa bera chak lo Spanish champion Barcelona hian an game leh ah league lama an elpui leh hmelma lian ber Real Madrid an hmachhawn dawn a, inkhel hmuhnawm tak an chhawp chhuak leh turah ngai ang.
Los Blancos hian tukin khan an pre season game hnihna khel ve in English team Manchester United lakah sihnih faiin hnehna an chang.