Champions League a record thar siamtu Lewandowski

Nizan khan Barcelona chuan tun season a an Champions League group match hmasa ber khelin an mikhual Viktoria Plzen chu 5-1 in an sawp. He game ah hian Kessie leh Torres te’n goal 1 ve ve an khung bakah Lewandowski chuan hattrick a siam. Group C table chung berah Barcelona hi an awm mek a, an hnuaiah Bayern Munich, Inter Milan leh Viktoria Plzen te an awm.

Nizan inkhela hattrick siamtu Polish striker hian Champions League ah record thar a siam a, chu chu club hrang hrang pathum tana hattrick siam thei hmasa ber a ni. Kum 33 a upa hian Borussisa Dortmund tan vawikhat, Bayern Munich tan vawi 4 leh Barcelona tan vawi 1 te a siam tawh.

Tin, Robert Lewandowksi hian Champions League ah Real Madrid striker Karim Benzema goal khung zat (86) a khung tling ve ta chiah a, Champions League chanchina goal khung tam ber pathumna ni mek in a chungah player ropui pahnih Lionel Messi (125) leh Cristiano Ronaldo (140) te an la awm.

£44 million a Camp Nou pantu Lewandowski a insiamrem thuai a, Laliga lamah pawh a che tha fu mai. A team tan league match li a khelh atangin goal 5 a khung tawh a, point 10 hmu mek in table a pahnihna dinhmun an luah. Barcelona hian tunkar inrinni zan dar 10 ah Cadiz an tlawh dawn a, Lewandowski an goal khung chhunzawm a duh ngei ang.

error: Content is protected !!