Barcelona leh Manchester United te chu Europa League Round of 16 play off 1st leg match ah 2-2 in inhnehtawk mahse Marcus Rashford chuan chak lo zawk ang maia an inhriat thu a sawichhuak.
Nizan inkhelah English international hian goal a khung leh a, tun season ah team tan goal 22 (all competition) a khung tling ta. Tin, World Cup zawh atanga chhiarin Rashford hian goal 14 a khung tawh a, ani aia khung hnem Europe top 5 league atangin an awm lo!
Camp Nou ah mual neitu Barca inhnehtawkpui mahse Rashford chuan tlawm zawk ang maia an inhriat thu inkhelh banah a sawichhuak. “Chaklo ni mai hian kan inhria. Game a kir leh turin kan khel tha em em a, kan fim in player te kan inphuah khawm tha hle bawk. Kan theih laiin chance kan insiam thuai a, goal pawh vawi hnih kan khung ngei. Game kan thunun hneh viau emaw kan tih laiin kan khingpuite (Barca) lam hi team tha ngang anni a, an sihphur an sut a ni.”
“Second leg hi tun aia game tha zawk anih ka beisei a, step khata hma lam kan pan ngei pawh ka ring” a ti.
Red Devils hian an game leh ah Leicester City chu Premier League ah an hmachhawn dawn a, hemi hnu hian Barca nen Old Trafford ah 2nd leg an khel chhunzawm bawk ang.
Dutch manager Erik Ten Hag hnuaiah Manchester United in hma an sawn em em a, league table a pathumna an nih mai bakah heng inelna hrang hrang pathum (Carabao Cup, FA Cup leh Europa League) ah te hian beisei tur an la nei bawk.
