Manchester United leh Brazil defensive midfielder Casemiro aiin West Ham United midfielder Declan Rice a that zawk thu Kieran Trippier an a sawichhuak.
Rice hian nipui transfer bazar inhawn hunah West Ham a chhuahsan ngei dawn niin a lang a, Premier League club lian te awhrawn a ni.
Manchester United leh Arsenal te chuan Rice hi lâkluh an tum dawn a, a man pawh a tlawm dawn hauh lo. Hammers lam chuan an midfielder manah hian £100 million aia tam an beisei dawn nia sawi a ni bawk.
Man Utd midfielder Casemiro leh Arsenal midfielder Thomas Partey te’n season duhawm tak hmang mêk mahse Trippier erawh in heng player pahnihte ai hian a hnampuipa Rice chu tun dinhmuna player tha zawk niin a ngai.
“Rice hi awihawmloh khawpa tha a ni. West Ham nena kan inhmachhawn tum kha in lo en ve em ka hre lova, Rice fin zia kha, kan ball inpekual min danchah dan te, field laia a talkual dan te, eng tiang taka chak nge anih, a awihawmloh zawk! Tuna a khelhdan en chuan khawvela player tha ber pakhat a ni” tiin Trippier chuan Rice chungchang a sawichhuak.
Magpies captain chuan sawi chhunzawmin,” Min ngai dik lo lo ula, Casemiro hian a trophy chawi tawh te, Champions League chen in, world class player a ni, amaherawhchu tun dinhmun kan sawi anih chuan Rice hi awihawmloh khawpa tha a ni. Tin, kum lamah pawh nise a la naupang zawk bawk.”
