Manchester United leh Portugal star Cristiano Ronaldo chuan football a chawlhsan hun tura a kum (age) duh a sawi.
Kan hriat angin Cristiano Ronaldo hian February ni 5 khian kum 37 a tlinna birthday a lawm dawn a, heti chung hian khawvel player tha ber pakhat a ni mek. Tun season khelh mekah Red Devils tan match 12 a inlan tawh atangin goal 14 a khung tawh a ni.
Ballon d’Or vawi 5 lai dawng tawhtu C Ronaldo chuan kum 40 a tlin hnu pawhin football khelh a la duh thu a sawi a, Europe top leagues lamah kan la hmu chhunzawm zel dawn niin a lang.
“Keima anga football rei tak tak khel ka hmuh hian ka hlim hle, keipawh hun rei tak chhung chu football level sang taka khelh hi ka duh a, tha taka che chhunzawm zel ka tum.” tiin C Ronaldo chuan ESPN a hrilh.
“Tunah hian kum 30 vel a upa chauhvah ka la inngai rih. Ka ngaituahna leh ka taksa hi ropui takin ka enkawl a. Kum 33 hnu lamah pawh thil thar ka thiam belh bawk. Mamawh kan neih te hi kan taksa hian a ti thei tih hi ka ring tlat a, mahse, inbeihna tak tak erawh rilru lam a ni zawk.
“Hun hnuhnung lamah hi chuan level sang taka awm hi thil harsa tak a ni a, mahse, he thil hi kum tlemte liamta chhung pawh khan ka ti tawh. Tun ai hian thawhrim ka mamawh dawn a, ka taksa hian min tih pui thei ngei ang tih ka ring, a chhan chu ka taksa hi ka zah a, englai pawhin ka ngaihven reng.”
“Kum 40, 41 emaw 42 vel thleng football khelh ka duh a, mahse, a pawimawh ber chu nitin goal khung a, nuam ti taka hun hman hi a ni.” tiin a sawi bawk.
Source SL