Manchester United winger Jadon Sancho chuan Cristiano Ronaldo hnen atanga hmuh a chak chu inkhelh leh training zawh vek tawh hnua amaha a training (work) dan a nih thu a sawi. Sancho chuan Cristiano Ronaldo hnen atangin hmasawnna tamtak a hmuh ngei a inbeisei.
Kan hriat angin kumin summer transfer lai khan Cristiano Ronaldo chu Old Trafford lamah a kir leh a. Old Trafford lama hun a hman hmasak zawkah khan season 6 chhung teh meuh mai a awm hman a, Ballon d’Or award hmasa ber a dawn mai bakah 2007-08 UEFA Champions League nomawi a chawi bawk. Mahse, tun tuma a kir leh chu mi te beisei ang leh duh danin a che tha vak lo niin a lang.
C Ronaldo hian Premiere League match hnuhnung 8 ah goal 1 chiah ala khung thei rih a, October thlaah khan Liverpool lakah 5-0 lai maiin an tlawm a ni. 2021 Ballon d’Or sem zawh takah pawh khan 6 na dinhmun chauh a hauh pha.
Tun dinhmunah rih chuan Crisitiano Ronaldo duh angin thil ala awm lo ti ila kan sawi sual awm love. Mahse, Jadon Sancho chuan amahah beiseina a nei a, a hnen atangin zir tur tamtak a neih thu a sawi.
English winger rawlthar hian Ronaldo kianga training ve chu a chak thu a sawi a. Jadon Sancho hian C Ronaldo chu amah chauhva a training lai hmuh a, hnaih tak atang en chu a duhthusam a nih thu a sawi. Hei mai bakah a hming sign sa jersey awm bawk se tih a duh.
“United in Ronaldo an sign tih ka hriat khan a mak hle mai tiin ka ngaih tuah. A career-a a thil lo tih tawh tamtak ka hmu a, amah ka assist thei a, a kiangah ka khel ve thei hi a tha tak zet .” tiin Jadon Sancho chuan England’s Youtube Channel a hrilh.
“Mahse, thil pakhat amah hnen atanga hmuh ka duh em em chu, pawn lama amah chauhva a training lai hi a ni, a bik takin keini ang player naupang zawkte tan a tha em em a, sang taka awm ve theihna tur atan a tha hle. Hming a sign sa jersey awm bawk se duhthusam a ni.” tiin Sancho chuan a sawi belh.
Kan hriat angin tun season khelh mekah Cristiano Ronaldo leh Jadon Sancho hi an khel dun ve nual tawh a. UEFA Champions League match-a Villarreal an hmachhawn tum khan an pahnihin scoresheet-ah an lang.
Source SL