Matthijs de Ligt chuan Juventus superstar Cristiano Ronaldo hian a teammate te chu englai pawha hnehna chang duh reng thinglung a neih tir a, training naah pawh a bang chuang lo niin a sawi.
Dutchman Matthijs de Ligt chuan a player duh te a sawi a, Portuguese star C Ronaldo pawh a duh zinga pakhat a ni.
“Leader te hi mitin tan englai pawhin example tha tak an ni ngei ang, sawi tam lam a ni lova, mahse, thil tih erawh a ngai. Dusan Tadic hian Ajax player naupang zawk te hnenah training tam an mamawh thu a hrilh thei ang. Mahse, Tadic hi training naah a thawhrim a, taima taka a training chauhin a sawi hi an pawm thei anga, chutichuan midang pawh an thawkrim thei dawn a ni.”
“Van Dijk pawh hi player te tan example tha tak a ni, Juventus pawhin Chiellini kan nei ve bawk. Chuan C Ronaldo hian englai pawhin hneh duhna rilru a neih tir ang che. Hetihlai hian Buffon kan theihnghilh tihna a ni lo, englai pawhin a tang thei hle.” tiin Matthis de Ligt chuan Tuttojuve a hrilh.
Juventus hian an theihna zawng zawng sawm khawmin season an khar a, Matthis de Ligt erawh duh angin che tha lem lo. Juventus chhuahsan tur anga sawi hial a ni.
Amah duhtu zingah hian Manchester United leh FC Barcelona an langsar hle a, mahse De Ligt hian a hmalam hun tur engmah a la sawi chiang lo.
Manchester United legend Jaap Stam chuan De Ligt chu thurawn pein, Allianz Stadium lamah la awm chhunzawm rih turin a duhsak. Stam chuan Matthis de Ligt tan Juventus chhuahsan chu thil tha ber a nih loh thu a sawi a ni.
Hetihlai hian Matthis de Ligt pawhin Juventus lama a hlim thu a sawi a, ‘kuminah che tha vak lo mah ila, tuia sangha an hlim ang mai hian ka hlim a ni’ tiin a sawi.
Source SL