Jonathan Woodgate chuan Cristiano Ronaldo hian thil danglam tak a thlen tir anga, Manchester United chu Top 4 a thlen pui ngei dawn niin a sawi.
Kan hriat angin Manchester United hian result duhawm lo tak an hlawhchhuak hle a, Red Devils hian point 18 hlawhchhuah tur awmah point 4 chiah an hlawhchhuak thung a ni. Champions League khelh theihna top 4 ah an lang lova, League hmahruaitu Chelsea chu point 9 lai maiin an pha tawh lo a ni.
Season tan tira che chhe em em, game hmasa pathum an khelh atanga tlawm vek leh goal khung lo Arsenal erawh an rawn che tha chho hle, international break neih hma khan Manchester United an rawn khum hram a nih kha.
Mahse, Leeds leh Tottenham defender hlui Woodgate chuan Ronaldo hian engkim mai a thlak danglam ang tiin a sawi. League match 12 a khelh tawh atangin goal 9 a khung mek a ni.
“Season tawp a top 4 awm hi thil harsa tak a ni. Man United hi an awm ka ring” tiin Jonathan Woodgate chuan Ladbrokes kaltlangin Metro Sport a hrilh. “Arsenal hian min hip hle” tiin a sawi bawk.
“Mikel Arteta kha pressure sang tak hnuaiah a awm hman, mahse, team tana a thil tih hi ka duh hle.”
“Manager sang tak a ni, a khelh dan style hi ka duh a, hetiang taka rawlthar player te a ring ngam hi ka chhuang hle.”
“Mahse, tun season khelh mekah Top 4 a awm chu an tan thil harsa tak a ni ngei ang. Cristiano Ronaldo effect a lang anga, United hi top 4 ah an awm ang.” tiin Woodgate chuan a sawi.
Title race chungchangah Woodgate chuan a ngaihdan a sawi a, Liverpool leh Manchester City tan Nomawi challenge chu thil harsa tak a nih tur thu a sawi a, Nakum May thla khian Thomas Tuchel’an tun season Premiere League nomawi a chawi ngei a ring.
“Kumin Premiere League nomawi chu Chelsea hian an chawi ka ring tak zet. A chhan ber chu goal an chhuah tlem tak zet.” tiin a sawi.
Forward lamah Romelu Lukaku annei a, defence lamah Reece James leh Ben Chilwell an awm bawk, Thomas Tuchel duh dan taka khel thei vek anni, goal khung lamah an duai lo hle bawk.
Source SL