Europa League round of 16 play off match a Barcelona leh Manchester United te an inhmachhawn hunah Sergio Busquets leh Ousmane Dembele te chuan Manchester United an hmachhawn thei dawn lo.
Spanish defensive midfielder hi Barcelona in 3-0 a Sevilla an hneh tumin kerêk hliam avanga lâkchhuah a ni a, SPORT chuan karhnih atanga karthum chhung a chawlh tur thu a tarlang.
Barcelona captain Busquets hian tun season ah league game 20 inlan theihna atangin game 18 lai a inlan a, kum 34 a upa ni tawh mahse club tana player pawimawh ber pakhat a la ni fan.
Busquets hian tun season ah Barca chu Spanish Super Cup a chawi pui tawh a, league ah lah nise point 53 hmuh pui tawhin an pahnihna a awm leh champion lai ni bawk Real Madrid chu point 8 laiin an tlansan tawh. League title chawi turin Xavi leh a nau te dinhmun a tha takzet.
Busquets mai bakah hian Ousmane Dembele pawhin hliam avangin Manchester United a hmachhawn thei dawn lova, 2nd leg ah erawh French forward hi a inlan thei tawh tura ngaih a ni.
Manchester United lam atang pawhin an midfielder pawimawh Christian Eriksen chuan Barcelona a hmachhawn thei dawn lova, Danish playmaker hi hliam avangin a chawl mêk a, April thlatawp lam emaw May thlatir lamah a inkhel leh thei chauh ang.
