Busquets an Inter Miami a zawm fel

Inter Miami chuan Sergio Busquets an lâkluh fel thu an puang a, season hnih chhung daih tur contract ziahpuiin kum 35 a upa hian Miami ah kum 2025 thleng contract a nei.

Busquets hian kumin nipui bazar khan free agent in Camp Nou a chhuahsan a, Saudi Arabia lam atangin sawmna dawng mahse United States lam pan a thlang thung a, he a thutlûkna siam ah hian a teammate hlui Lionel Messi a inrawlhthuk hle nghe nghe nia sawi a ni.

Spanish legend Busquets hian a club hlui Barcelona tan season 16 a inlan chhungin game 722 lai mai a khel a, trophy pawh 32 zet chawiin chung zingah chuan LaLiga 9 leh UEFA Champions League 3 te a tel nghe nghe bawk.

Inter Miami in nimin lama Lionel Messi an lâk fel hnuin vawiin ah Sergio Busquets an lalut fel leh nghal a, tun hnai chu MLS lamin thawm an nei lian hle.

Messi leh Busquets te bakah Barca legend dang Jordi Alba leh Andres Iniesta te chu Inter Miami nena sawizawm mêk anni a, tuna Gremio striker Luis Suarez pawh Miami lam pan thut thei a ni ve reng bawk.

Heng zawng zawng hi a thleng dik anih chuan MLS lamah Barca legend te team khata tana an khel ho kan hmu leh thei dawn a, he thil hian entu mipui tam tak a hip ngei ang le!

Hetih mêk lai hian Messi leh Busquets te club thar Inter Miami hi an che tha lo khawp mai a, Eastern conference ah table hnuai ber luah mêk in an game hnuhnung 11 ah chakni hmel an hmu tawh lo. Inter Miami talbuai mêk hi Barcelona legend te’n an khaichhuak thei ang em tih kan hre thuai ang chu.