Brighton manager in £60 million a Chelsea pan tu Cucurella a fak

Brighton manager Graham Potter chuan Brighton history an player hralhchhuah to ber Marc Cucurella a fak a, club in player transfer an kalpui dan ah a inchhuang hle bawk.

Brighton hian season hmasa khan Getafe atangin £15 million in Cucurella hi an lalut a, thla 12 an enkawl hnuin Chelsea lamah £60 million vel a hralhchhuak leh in an sum hlep zat chu £45 million hu vel ani.

The Seagulls hian tun kum thum chhunga player an hralhna atangin £150 million vel an lalut thei a, sum an hailut hnem hle. An player hralhchhuah zingah Ben White (Arsenal), Dan Burn (Newcastle United), Yves Bissouma (Tottenham) leh Marc Cucurella (Chelsea) te chu a to zual anni.

”Heng player lei leh hralhchhuah hi club thil phung pangngai mai ani. Player lei hi a awlsam em em a, a hun tak leh a man tur dik taka player hralhchhuah erawh hi chu a harsa hle thung. Tun hnai kum thum chhungin player hralhchhuahna atanga £150 million vel kan lalut thei hi thil ho tham ani hauh lo. Kan transfer kalpui danah hian kan inchhuang hle a, heng zawng zawng kan tih theih chhan chu kan player chhuak ta te avang khan ani. Anni ho kha fak phu chu anni a, keini lam chuan an hmasawn theihnan tan kan lo la mai ani” tiin Brighton manager Graham Potter an an club transfer chungchang a sawi.

Graham Potter chuan tun transfer window a £60 million a Chelsea zawm tu Marc Cucurella chungchang pawh sawi leh in, “Marc kha hralhchhuah kan duh lova, hralh chhan tur lah ka nei hek lo. Amaherawhchu club lian zawk Champions League hial khelpha atanga sawmna a dawn chuan keini lo chelh theih ani lo, thil harsa tak kan tih a tul ani. Kan tum ber chu a man phu tawka hralhchhuah kha ani a, kan tihlawhtling ngei bawk in ka hria. Kan tan khan player tha bik ani a, mi tha tak ani leh zel bawk. A hma hun turah duhsakna ka hlan a, keini erawh a team ang in hma lam kan pan zel ang” a ti.

Related Posts

error: Content is protected !!