Brighton in an manager Graham Potter leh Chelsea hotute inbiakna neih an remti

Manager thar zawngkual mek Chelsea chuan Brighton manager Graham Potter an rim mek a, Brighton lam pawh hian an manager leh Chelsea lam hotute inbiakna chu khap buai an tum lo tih Sky chuan a tarlang.

Tun season ah Chelsea in Premier League match ruk leh Champions League match khat an khelh hnuin manager Thomas Tuchel an club hotute lung a thlu lova, rinloh takin German coach hi zanin tlailam khan a hna atanga ban a ni.

English coach Potter mana Brighton phut zat chu Chelsea lam hian pektlak an inhuam a, Potter mai bakah hna neilo a awm mek Zinedine Zidane leh Mauricio Pochettino te pawh Chelsea lam hian an ngaihven niin thuthang a awm bawk.

Chelsea hian tun nipui bazar khan player thar lakluh nan £273 million an hmang a, anni aia transfer bazar khata sum thehchhuak hnem an awm lo. Sum hmang tam viau mahse beisei ang chhana erawh Tuchel enkawlna hnuaiah an hmu mai thei lova, a tawp ah an ban ta nge nge a ni.

Chelsea lakluh tum Graham Potter hian tuna a enkawl mek Brighton & Hove Albion chu Premier League game ruk a khelhpui atangin point 13 an hlawhchhuak tawh a, table ah 4-na anni mek. An hnuaiah big six team atangin Man Utd, Chelsea leh Liverpool te an awm.

Tuchel leh Chelsea player thenkhat te an inkarah buaina neuh neuh a awm mai bakah club chairman Todd Boehly nen pawh an inhmuthiamlo a, hei hi Tuchel an ban chhan niin media te’n an tarlang.

Related Posts

error: Content is protected !!