Chelsea chuan tukin zinglam dar 4:30 khan kumina an pre season game hnihna khelin Premier League a an elpui Brighton & Hove Albion chu Lincoln Financial Field, Philadelphia ah 4-3 in an hneh.
Goal 7 lawih lut a ni a, friendly match mah nise inkhel hmuhnawm tak a ni. Chelsea tan Nkunku, Mudryk, Gallagher leh Jackson te’n goal khat theuh an khung a, Brighton lam tan Wekbeck, Pedro (penalty) leh Undav te’n goal an khung ve bawk. Brighton defender Van Hecke chuan yellow card a hmuh nawn avangin minute 60 na ah hnawhchhuah a tawk a, De Zerbi nau te’n darkar chanve chhung kimloin an khel.
Brighton laka goal khat ve ve khungtu Mudryk leh Jackson te chuan Chelsea tana an goal hmasa ber an khung a, an team hnehna an chanpui bawk nen, an tan ni duhawm a ni.
Ukraine international Mudryk hian kumin January thla khan £89 million in Shakhtar Donetsk atangin Chelsea a zawm a, Blues tan season hmasa chawhnu lam khan inlena hrang hrangah game 17 inlan mahse goal a khung lova, assist erawh vawi 2 a nei. Nikolas Jackson erawh in kumin nipui bazar khan Villareal atangin Chelsea a zawm a, a manah Blues chuan £30 million an insêng.
Inkhelh banah Pochettino chuan hetiang hian Mudryk a fak, “Player ropui leh talent nei tha la naupang bawk si a ni. Kan team ah hian a pawimawh a ni tih a inhriat theihnana siam kan duh. A thiam thil ropui tak te nuam ti taka a chhawpnchhuah theihna tura tanpui hi kan tana chona lian tak a ni.”
Chelsea boss chu Jackson chungchang sawi leh in, “Ani ang player Chelsea in kan lalut anih chuan club in a laka ata thil engemaw tak hmuh kan inbeisei vang a ni. Talent pui tak a nei a, amaherawhchu insiamrem hun a mamawh” a ti.
Pochettino nau te’n pre season an la hmang tha zel a, 5-0 a Wrexham an hneh hnuin 4-3 in Brighton an hneh leh bawk. An game leh ah Blues hian Newcastle United an hmachhawn ang.
