Brazil hian rawlthar player tha tak tak alo nei nual tawh a, Pele, Garrinha, Ronaldo Nazario, Rivaldo leh Ronaldinho te hi an hunlai chuan rawlthar duhawm tak an lo ni thin.
Brazil hi khawvelah chuan football ngaisang bertu anni hial maithei, khawvel football tha tia kan sawi thin te hi Brazil player anni nuk mai.
Engpawhnise, tun tumah hian rawlthar player Brazil National team tana khel ve thut thei dinhmuna ding mek rawlthar player 5 te kan rawn tarlang ve leh dawn a ni.
5 Reinier Jesus (Borussia Dortmund, on loan from Real Madrid)
Reinier Jesus Carvalho hi kum 2002 khan Brazil-ah alo piang a. Kum 2011 khan attacking midfielder angin Vasco da Gama atangin a career bul a tan. Botafogo leh Fluminese tan kum khat ve ve a khel a, Kum 2014 khan Flamengo rawlthar player tha tak pakhat a ni.
Kum 2019 khan Jesus Carvalho hi senior team ah a kai chhova, match 14 a inlan atangin goal 6 a khung thei. Real Madrid lamin an ngaihven hle a, kum 2020 khan €30 million lai maiin an la lut. A thlen hnu lawkah Real Madrid reserve team Castilla ah an dah lut nghal a ni.
Thla tlemte Spain lama hun a hman hnuin, Borussia Dortmund lamah loan in a khel a, tun season chhung a khel ang. Champions League match Besiktas an hmachhawn tum pawhin a khel tha hle.
Carvalho hi Brazil youth team tan pawh lo khel ve tawh nual a, U 15, U17 leh U23 team tan khel tawhin, match 22 a inlan atang goal 10 lai a khung thei a ni. A rang em em a, Brazil National team tan a khel thuai tura ngaih a ni.
4 Richarlison (Everton)
Richarlison de Andrade hi kum 1997 khan a piang a, kum 2013 khan Real Noroesta atangin career bul atan. Hemi hnu rei vak lovah America Mineiro tan khel lehin, Kum 2015 khan senior team lamah a kai sang.
Senior team-ah season 2 a hman chhung khan game 24 a khelh atang goal 9 a khung. Fluminese lamin an la lut nghal a, goal 19 a khung a, kum 2 chhung hun a hmang. A kum hnihnaah phei chuan team of the Season-ah a lang nghe nghe.
Watford lamin kum 2017 khan £11.2 million in an la lut. The Hornets lamah kum khat chauh la hmang rih mahse, Young Player of the Season atan an thlang nghal. Kha season ah khan Watford tan league match 38 a khel vek a ni.
Kum 2018 ah Everton chuan £35 million lai maiin an la lut a, The Toffees tan hian match 129 lai inlan tawhin, goal 45 a khung mai bakah assist vawi 11 a nei tling mek.
2020 Sumer Olympic neih takah khan Brazil squad-ah koh a ni, final-ah Germany an hmachhawn tum pawh khan hattrick siamin, goal 5 lai a khung mek.
Brazil senior team tan a inlan thuai a rinawm.
3 Gabriel Martinelli (Arsenal)
Gabriel Teodoro Martinelli Silva hi kum 2001 khan a piang a, kum 2010 khan Corinthians atang career bul a tan. Kum 4 chhung hun a hman hnuin kum 2015 khan Ituano lamah a insawn. Kum 2017 khan a vawikhatna atan proffessional contract a sign. Kum 2 hnuah senior game hmasa ber a khel.
Tunah hian Arsenal tan khel mekin player che tha tak a ni mek. Arsenal tan match 60 inlan tawhin goal 13 a khung mai bakah assist vawi 9 a nei tling bawk.
2 Antony (Ajax)
Antony Matheus dos Santos hi kum 2000 khan Sao Paulo Brazil-ah a piang a, an khawchhunga club pakhat tan kum 9 dawn tep a khel.
Kum 2018 khan Sao Paulo senior team lamah a kai chhova, winger angin a khel. Kum 2020 ah Ajax chuan £13 million lai maiin an la lut. Ajax tan match 62 ah inlan tawhin goal 17 a khung mai bakah assist 14 a nei mek. UEFA Champions League khelh mekah goal 3 khung tawhin assist vawi 4 a nei bawk.
1 Vinicius Jr. (Real Madrid)
Vinicius Jose Paixao de Oliveira Junior hi kum 2000 khan Sao Goncalo, Brazil ah a piang a, Flamengo tan kum 12 chhung teh meuh mai a khel a ni. 2017-18 season khan senior team ah kai chhovin, match 50 a inlan atang goal 11 a khung.
Kum 2018 ah Real Madrid chuan Vinicius Jr hi €45 million lai maiin an la lut a, kha tih lai khan kum 18 a upa chauh a ni.
Source SL