Manchester City a contract hmang zo Benjamin Mendy chu vawiin lam khan Ligue 1 club Lorient in an lâkluh fel thu an puang a, kum 2 chhung daih tur contract an ziahpui bawk.
Kar hmasa lam khan Mendy hi pawngsual thubuaia an puhna zawng zawng atangin a fihlim tih court chuan a puang a, thiam chantir niin tunah chuan inkhel mualah hun a hmang leh thei dawn ta.
Pawngsual thubuai avanga man anih hnuin Mendy hi August 2021 atang khan Manchester City chuan inkhel thei lo turin an hrem a, kumin nipui bazar khan a contract neihlai hmang zo chiah in City lam pawhin an chhuah zalen.
France defender hian 2017 khan £52 million in Manchester City a zawm a, hemi hma hian Ligue 1 club Monaco leh Marseille te tan a lo khel tawh bawk.
Kum 29 a upa hian Premier League title 4 leh Ligue 1 title 1 te a chawi tawh a, 2018 FIFA World Cup a France an champion tum khan team squad ah a tel ve bawk.
Kum 2 dawn a inkhelh theih loh hnuin Mendy a inkhel ve leh thei dawn tawh a, a lawmpui awm takzet. City left back hlui hian Lorient ah jersey number 5 a ha ang.