Bayern Munich chuan Napoli atangin centre back Kim Min-jae an lalut fel a, kum 2028 thleng daih tur contract an ziahpui. German champion hian kum 26 a upa defender manah hian a release clause €55 million chu Napoli hnenah an pe tla a ni.
Kim hian 2022 nipui bazar lai khan €18 million in Fenerbahce atangin Napoli a zawm a, Serie-A a a season hmasa berah team player pawimawh ni thei nghalin season hmasa khan league game 1 chiah a hmaih!
2022/23 Serie A best defender lawmman dawngtu hian season hmasa khan Napoli chu league title a chawipui a, kum 32 teh meuh hnua Napoli in league title an chawi leh hmasak ber tum an tawng.
South Korean defender hian Bayern Munich a zawm chungchangah hetiang hian a ngaihdan a sawi, “FC Bayern hi footballer tin te kal châkna a ni a, Munich a ka tawn tur zawng zawng te hmachhawn turin ka inpeih. Ka tan chuan tun hi bul tan tharna a ni a, he hmunah hian hmasawn belh ka tum dawn a ni. Ka tum hmasak ber chu game khelh a ni a, chumi hnuah a tam thei ang ber trophy chawi a ni” a ti.
Bayern Munich CEO Jan Christian Dressen chuan Kim Min-jae an lâkluh chungchangah a ngaihdan hetiang hian a sawi ve a, “Kim Min-jae hian hma a sawn hle a, tun hnai mai khan SSC Napoli chu league title chawipuiin Serie A defender tha bera thla a ni bawk. A taksa pian hmang bakah a rilru puthmang leh tuanranna thleng hian kan lung a dum hle.”
“A inkhel tan nghal thei tur pawh hian min tiphur tlang em em a, a kheldan hmang hian fans te a tihlawm ngei pawh kan beisei a ni” a ti.
