Bundesliga champion Bayern Munich chuan Manchester City right back Kyle Walker sign theih an inring hle.
Bayern Munich hian thla hmasa lam khan Walker hi an lo dawr tawh a, Walker pawh hian chona thar hmachhawn turin leh inkhel tam tura Germany lam pan a hnial lo nia sawi a ni.
Amaherawhchu a hnu lawk ah City in Walker chu la kawl chhunzawm zel an duh thu leh contract thar ziahpui an duh thu report a ni leh a, tun thlengin erawh thu chiang tak a la awm lo thung.
Tun hnai mai khan German chanchinbu lar BILD chuan Bayern Munich leh Walker te an inhnaih thu a tarlang a, Etihad Stadium a season khat bak contract nei tawh lo Walker hi Bavarians chuan sign theih ngei an inring pan pan hle.
Kum 33 a upa Walker hi Transfermarkt market chuan a hlutna hi £13 million vel niin a chhut a, a kum lam uaithla ve deuh tawh mahse inkhel muala a la that zia chu tun season a top winger Kylian Mbappe, Vinicius Jr leh midangte a lo hmachhawn tawh danah a chiang e.
Bayern in an right back Lucas Hernandez chu Paris Saint Germain lamah an hralhchhuak hnai a, loan a an hawh Joao Cancelo lah a lei nghehna man tur a to deuh avangin Bayern in an chhuah fel tawh bawk.
Bundesliga champion hian Napoli atangin South Korean defender Kim Min-jae chu €50 million in sign dawn mahse Kim hi natural right back a ni lova, centre back a khel thin a ni.
Hetiang anih leh zel tâkah chuan Bayern hian right back thar an mamawh hle a, tun dinhmunah England leh Manchester City star Kyle Walker chu an target a ni. Thomas Tuchel an Chelsea a enkawl lai atang tawhin Walker hi a lo awt tawh a, kuminah lâkluh tuma tan la mêk in a hlawhtlin ngei pawh a inring.