Bayern Munich chuan season khat lek an kawl hnuah Liverpool star hlui Sadio Mane chu an chhuah phal der tawh mai!
Germany a report tarlan danin club hotute chuan Mane hi season thara an ruahmanna (plan) ah a tel tawh loh thu an hrilh a, an forward hian club dang zawm thuai se an duh. Saudi lam chu Mane lalut thei tura rinkai ber anni mek a, transfer fee bakah a hlawh tur pawh pe tam thei ber tur te anni.
Mane hian nikum nipui bazar lai khan £35 million in Liverpool atangin Bayern Munich a zawm a, Allianz Arena ah hian season thum chhung daih tur contract a ziak. Beiseina sang tak nen Bundeslisga lam pan mahse a beisei ang in erawh thil a kal lova, hliam in a tlakbuak avangin 2022 World Cup ah a ram Senegalese tan a inlan thei lo hial.
A hliam te dam fel a a inkhelh leh theih hnu pawhin Mane hian beisei a phak loh chhunzawm a, April thlaa Champions League quarter final ah Manchester City laka an mualpho hnuin Etihad dressing room ah Sane nen buaina an lo nei tawh a, Senegalese forward hian German forward chu a hmuiah hnek in thisen hial an inchhuah!
Kum 31 a upa hian Bavarians tana a season hmasa ber ah inelna hrang hranga game 37 a inlan atangin goal 11 leh assist vawi 6 a thawkchhuak a, league title chawi ve bawk mahse beisei a phak lutuk loh bakah a teammate chunga kut hial a lek duh mai avangin a lakah club hotute an lungni lo hle nia sawi a ni a, kumin nipui bazar hian chhuak ngei se an duh.
Bayern hian Mane an hralhchhuak thei anih chuan Harry Kane lakluh an tumna kawngah nasa zawk in a pui thei dawn a, English striker man turah sum tam zawk an theh chhuah ngam dawn bakah hlawh tam zawk pek an inhuam bawk ang.