Bayern in Kane man tur bid vawi thum-na theh lut dawn

Tottenham Hotspur chuan Harry Kane man tur bid chu a vawi thum nan an theh lut hnai a, Spurs coach Ange Postecoglou chuan an striker hma hun zel tur hi tihfel thuai nise a duh thu a lo sawi tawh bawk.

Kane leh Bayern te’n mimal thilah inremna an nei tawh a, club pahnihte an inbe fel thei anih phawt chuan England captain hian lawm takin Allianz Arena lam a pan ang.

Spurs chuan an striker hi contract thar ziahpui ngei tum hlawh tha tak bakah inkhelh a chawlhsan hnua coaching hna pêk inhuam mahse a player berin North London a cham zel a tum lova, trophy a chawi theihna hmun tur nia a hriat Bayern Munich lama insuan a duh avangin a rilru ah contract pawhsei lam reng reng a lang tawh lo.

Hetih mêk lai hian Bayern lam pawhin Spurs striker hi lâkluh tumin tan an la mêk a, chutihrualin an bid theh luh vawi hnih lai mai chu hnâwl a ni tawh. Spurs chuan an striker hi a chhuak dawn rau rau anih chuan a manah £100 million an phut a, kum 29 a upa leh club a season khat bak contract nei tawh lo player ni mahse tlawm taka chhuahtir an tum lo hle!

The Times tarlan danin Bayern chuan kuminah Kane hi lâkluh ngei an tum a, a vawi thum nan England leh Spurs tana goal khung tam ber man tur bid thar an chhawp chhuak dawn a, add ons nen £100 million kaichho tura duan a ni.

Spurs head coach Ange Postecoglou chuan an striker chungchang hi chinfel thuai nise a duh thu a lo sawi tawh a, chutihrualin hun bituk (deadline) erawh neih a duh loh thu leh Kane chungchanga thutlukna chu tu tan pawha chhan tha ber anih a beisei.