Bayern Munich chuan kumin nipui bazarah Harry Kane an lâkluh theihloh hlauh chuan Manchester City striker Julian Alavarez lâkluh an tum dawn.
Bayern Munich chuan England captain lâkluh tumin bid vawi hnih lai theh lut tawh mahse Spurs lamin an la hnawl zel a, kuminah Kane hi lalut thei lovin nakkum lam an nghah a ngai dawn anih chuan Bundesliga champion hian an plan B an hmang dawn a, chu chu loan a Manchester City striker Julian Alvarez hawh a ni tiin Sky Sports chuan a tarlang.
Alvarez bakah Bayern Munich lam hian Juventus striker Dusan Vlahovic leh Werder Bremen forward Niclas Fullkurg te pawh an ngaihven tel bawk.
Alvarez hian 2022-23 season kha a hmang tha hle a, a ram Argentina chu FIFA World Cup a chawi pui bakah a club khelhna Manchester City chu a treble pui bawk.
Kum 23 a upa hian season hmasa khan Cityzens tan inelna hrang hranga game 49 a inlan atangin goal 17 leh assist vawi 5 a thawkchhuak a, second striker ni mahse a stats a nep lo hle. Tin, FIFA World Cup khan Argentina tan game 7 a inlan atangin goal 4 a khung a, a thawhhlawk takzet.
Bayern Munich chu tun nipui bazara Harry Kane lalut thei awm ang ber anni a, kum 29 a upa striker pawh hian Allianz Arena lama insuan a hreh lo nia sawi a ni bawk. Hetih mek lai hian forward thar mamawh nia inhria Paris Saint Germain pawhin Kane hi an ngaihven mêk a, England captain manah hian Ligue 1 champion chuan sum tam tak sên an inhuam bawk.