Bayern in Kane agent an be tan

Bayern Munich chuan nakkum nipui transfer bazar ah Tottenham Hotspur striker Harry Kane lakluh ngei an tum dawn a, tunah hian a agent an be tan der tawh.

German champion hian an striker Robert Lewandowski chu transfer bazar liamta ah khan Barcelona lamah an chan a, a thlaktu turin English forward Harry Kane lakluh duh viau mahse tih hlawhtlin in a awm lo.

Kum 29 a upa Harry Kane hi tun hnai kuma Premier League mai bakah khawvel huap ang pawh a striker tha ber te zinga mi a ni a, Premier League history a goal khung tam ber pathumna anih mai bakah a ram England tan pawh goal khung tam ber pahnihna a ni mek a, pakhatna a nih thuai pawh a beiseiawm hle.

Harry Kane hian season hmasa khan Premier League champion Manchester City a zawm teuh hle a, khatih hun laia striker neilo City chuan Harry Kane manah £150 million hial thehchhuah inhuam mahse Spurs lam in an striker chhuanvawr hi an chel bet thei hram.

A career a nomawi la chawi lo Kane hian inkhelh a chawlsan hma ngei a nomawi chawi thei tur club pan a duh ngeiin a rinawm a, Tottenham a season hnih bak contract nei tawh lo hian nakkum a Bayern Munich a zawm anih pawh in a mak hran lovang.

Journalist Florian Plettenberg tarlan danin Bayern Munich hotute’n Harry Kane agent leh a unaupa ni bawk Charlie Kane chu inbiakna an neihpui tawh a, England captain hi Allianz Arena ah sengluh ngei an tum. Kane hian tun season kal mekah Spurs tan league game 6 a khelh atangin goal 5 a khung tawh a, a la che tha zel.

Related Posts

error: Content is protected !!