English international hlui Danny Murphy chuan Harry Kane an Bayern Munich zawm theihna hun tha a neih chuan tihlawhtling ngei se a duh.
England captain Kane hian Tottenham Hotspur ah thla 18 bak contract a nei tawh lova, a hma hun zel tur hriatchian a nilo. European club lian Bayern Munich leh Real Madrid te nena sawizawm mek ni mahse report tarlan danin Kane hian Tottenham ah contract thar ziah a pawi tilo.
Kum 29 a upa hian Spurs tan goal tam tak khung tawh mahse tun thlengin nomawi a la chawi lova, nomawi chawi lovin a career a hmang tluan mai ang tih chu mi tam takin an hlauhthawn pui.
Liverpool legend Danny Murphy chuan Kane chu a khelhna club sawn ngei se a duh thu hetiang hian a sawi, “Bayern Munich in nipui bazar ah Harry Kane hi an sawm anih chuan zawm ngei rawh se. Ani ang theihna nei sang player in a career a nomawi pakhat mah a chawi lo anih chuan a zia lo hle ang. Inkhelh a chawlhsan hunah nomawi a chawi lo anih chuan a la inchhir nasa dawn.”
”Ka career kha ka enlet hian nuam ka tih lai ber chu Liverpool a trophy ka chawi tum te kha a ni. Hamrik tawp ruala kan hlim zia te, teammate leh fans te nena kan lawm (celebrate) te kha, party leh trophy lawmna kawng zawh (parade) kan neih zawng zawng thleng te khan. Heng zawng zawng hi rim taka kan thawh chhan a ni a, vanduaithlak takin Spurs chuan hetiang hlimna leh ropuina hi world class striker Harry Kane hnenah an pe thei lo.”
“Ram dang a pan anih chuan Premier League a Alan Shearer goal record a khum lo maithei a, amaherawhchu Champions League trophy, Bundesliga leh ramchhunga trophy chawi theih tam tak a chawi thung dawn a ni. Kane hian Germany ah hlawhtlinna ropui a chan hi ka ringlel lo ve” a ti.
Kane hian tun season ah pawh a thiam a la theihnghilh lova, league goal 16 khung tawhin City striker Haaland che tha viau lo phei se chu tun aia fak hlawh zual tur a ni. Zaninah Spurs in City an lo mikhual dawn a, English forward hian goal khung ngei a tum ang.