Nizan Champions League group stage match hnihna ah Bayern Munich chuan an khelmual Allianz Arena ah Barcelona an lo mikhual a, mual neitu lam Bayern hian Hernandez leh Sane te goal hmang in 2-0 in hnehna an chang.
Chaklo zawk mah nise Barcelona manager Xavi chuan Bayern lam aia a naute an khel tha zawk niin a ngai a, goal hmaa an hriam tawk lo erawh pawi a ti hle thung.
”Nangmah ang level Champions League ah i hmachhawn a, tihsual i ngah anih chuan hrem i ni thin. Bayern aiin kan khel tha zawk a, vawi 6/7 dawn chu goal khung theihna hun tha tak tak nei mah ila kan vanduai. Bayern lam erawh in an hun tha neih an hmang tangkai takzet” tiin Barcelona manager Xavi an Bayern lam aiin khel tha zawk mahse goal hmaa an vanduai thu a sawi.
Nizan inkhela goal khatna hi set piece atanga lut niin corner atanga ball lokal chu chângtu nei mumal lo Lucas Hernandez an a tauh goal. Tin, a goal hnihna luhdan ah pawh hian Barca defender te’n an hna an tlin tawk lo. Leroy Sane an a duh anga penalty box chhunga ball a khalh luh hnuin hnai set sawt atangin Barca goalkeeper Ter Stegen a bum.
”Goal hmasa ber luh chhan kha kan ‘marking’ that tawk loh vang a ni a, goal hnihna pawh kha kan foul loh vang a ni bawk. Goal hnih an khung hnu pawh khan kan hnual mai lova, game kan thunun a, goal khung theihna hun tha kan la insiam reng bawk. A pawi ta ber chu goal hmaa kan hriam tawk lo kha a ni. Kan chaklona hi a tha lam zawnga lak kan tum dawn a, kan tihsual te inzir leh insiamthat hi kan duh chu a ni” tiin Xavi an a nau te’n hnehna chang lo mahse hmasawn zel an tum thu a sawi bawk.
