Bayern Munich chuan Tottenham Hotspur striker Harry Kane man tur bid thar £70 million an theh lut dawn.
Daily Mail tarlan danin Bundelisga champion hian Harry Kane lakluh an la tum reng a, a man turah a vawihnih nan £70 million bid thar an theh lut ang. Bavarians hian Kane man tur £60 million bid an lo theh lut tawh a, amaherawhchu North London club lamin an hnawl chiang hle. Tin, tuna an bid thar theh luh leh tur £70 million pawh hi Spurs chairman Daniel Levy an a hnawl leh ngei in a rinawm bawk.
Kane hi Spurs leh England legend niin khawvela striker tha ber te zinga mi a ni a, amaherawhchu tuna kum 29 upa anih thleng pawhin trophy a la chawi lo! Spurs ah a la cham chhunzawm zel anih chuan heihi a inthlak danglam in a rinawm lova, chuvang chuan nomawi a chawi theihna tur club lian dang a zawm a ngaih hmel.
2021 nipui bazar lai khan Manchester City chuan Kane hi £150 million laiin sign an lo tum tawh a, a player ber pawhin Tottenham chhuahsan a duh avangin team training te a thulh hial. Nimahsela Spurs chairman Levy an a striker hi a chhuah phal ngang lova, City lam atanga sum tam tak offer an dawn pawh a hnawl fithla thak!
Chhuah an phal miau loh avangin Spurs ah Kane a la cham chhunzawm ta nge nge a, tunah erawh England captain hian season khat bak contract a nei tawh lo. Kane hian club lian dang zawm a duh a, May thla daih tawh khan Bayern boss Tuchel nen transfer chungchangah inremna an lo nei tawh nia report a ni.
Daniel Levy chuan a striker club a season khat bak contract nei tawh lo manah hian £100 million a la phut cheu nia sawi a ni a, hetiang zata tam sum hi Bayern lamin an theh chhuak phal chiah in a rinawm loh thung! Hetiang anih chuan Spurs in Kane hi kuminah an hralhchhuak lo anih chuan nakkumah a thlawna an chhuahtir a ngai dawn a, January thla lo inherchhuah hunah England legend hian club dang zawm turin pre contract a sign thei bawk ang.