Barcelona ‘thar’ hmachhawn tura inpeih Bayern

Bayern Munich manager Julian Nagelsmann chuan kum hmasa lama an lo sawp tawh thin Barcelona hmachhawn tura an inpeih thu a sawi. Bayern Munich leh Barcelona te hi zanin zanlai dar 12:30 ah Allianz Arena ah an innuai ang.

Barcelona in tun season a an Champions League game hmasa ber ah Viktoria Plzen chu 5-1 ngawt in an sawp a, zanin a an hmachhawn tur erawh an tawhkhirh viau tura ngaih a ni.

Tun hnai ah Barcelona an che tha em em a, league table ah pahnihna dinhmun luah mek in Champions League lamah pawh group stage table chung ber an luah mek. Zanin a an tumpui tur Bayern Munich lam ve thung hi tun season league game thum ah an khelhpuite an inhnehtawkpui a, an chet that ber tum a nilo chiang. Mahse, tun hnai kumah Bayern hian Barcelona an ngam hle a, 2021/22 season khan home leh away ah 3-0 ve ve a hnehna changin, 2020 khan 8-2 ngawt in an lo chak tawh bawk anih kha.

”Barcelona hi kan hrechiang a, ka player te hnenah pawh ‘heihi chona thar chu a ni’ tiin ka hrilh. Team thar anni tawh a, player tha tak tak, Lewandowski chen in an nei” tiin Bayern coach Julian Nagelsmann an Barca chu team thar an nih tawh thu a sawi.

German coach chuan sawi chhunzawmin,”Kan intawh hnuhnun match 4 a thil thleng khan awmzia a nei tawh lova, tunah chuan team hran hlak anni tawh. Rawlthar tha tak tak Gavi leh Pedri te an kawl a, en bik an hlawh ngei ang. Xavi hian hna ropui tak a thawk a, hmachhawn an harsa dawn hle” a ti.

Tuna Barcelona squad atang hian Bayern Munich lama goal khung an la awm lova, zanin hian tun season a Barca tana goal 9 khung tawh tu Robert Lewandowski chu Spanish club inghahna ber anih a rinawm.

Related Posts

error: Content is protected !!