A hma hun chiang lo ruai karah Atletico Madrid forward Joao Felix chuan Atletico hmelma leh elpui ni bawk Barcelona zawm a châk thu a sawi a, Camp Nou lama insuan chu a naupang tet ata a lo suangtuah thin.
Felix hian season hmasa chawhnu lam khan loan in Premier League club Chelsea a zawm a, amaherawhchu Blues tana beisei a phâk loh avangin thlaruk hnuah Atletico lama thawnkir leh a ni.
Kum 23 a upa hian kuminah club lian dang zawm a duh a, Atletico Madrid lam pawhin an forward hi hralhchhuah an pawi ti lova, amaherawhchu to taka an lâkluh kha a ni miau a, tlawm tak chuan an chhuah phal lo tawp ang. A hma hun chiang lo ruai karah Felix chuan Barcelona chu a club thar ni thei se a duh hle.
Felix chuan, “Barca tana inkhelh theih hi ka duh ang. Barcelona hi engtik lai pawha ka duhthlan hmasak anni a, Barca zawm hi ka châk hle. Ka naupang lai ata tawh ka lo suangtuah thin a, ka zawm theih ve hlauh chuan ka suangtuahna te kha a thleng dik dawn tih a ni” a ti.
Felix hi kuminah mai nilo nikum lamah pawh Barca nena sawizawm an lo hlawh viau thin a, mahse tun thlengin Barca lam a la pan thei lo chu anih hi. Tun dinhmunah Barcelona sum dinhmun a duhawm lo em em a, Felix lâkluh nana sum tam hman tur an nei lo tih chu thil chiang a ni. Chuvangin Blaugrana hian Felix hi an lalut duh anih chuan loan hmanga lâkluh an tum mai a ngai ang.
Portuguese international hian 2019 khan Benfica atangin €126 million in Atletico Madrid a zawm a, season hmasaa loan a Chelsea lam a pan hma khan Atletico ah a contract neihlai a pawtsei a, tunah chuan Felix hian Civitas Metropolitan Stadium ah June 2027 thleng contract a nei tawh.