Barcelona ah ka kir lovang, Real Madrid sawmna erawh ka hnar lovang – Deulofeu

Barcelona tan lo khel tawh mahse Udinese star Gerard Deulofeu chuan hlim taka Barcelona hmelma lian Real Madrid a zawm theih tur thu a sawi. Udinese tana khel tha Deulofeu hi Serie A lamah lawm a hlawh hle.

”Nipui bazar khan chhuah theihna hun tha chu ka nei mahse ka chhuak ta lo. Ka hmanhmawh vut vut lova, ka chhuak dawn anih chuan club pahnih tana thil tha tur anih phawt ka duh. ‘World Cup khelh i la beisei em’ min ti maw? Dik takin ka sawi ang, hun rei tak chhung ram aiawha koh ka ni tawh lova, amaherawhchu beiseina ka la hloh chuang lo. Ram aiawha inlan tur hian elpui tha tak tak kan nei”.

‘Laliga a kir leh i duh em?’ tia an zawhna kum 28 a upa chuan chhang leh in,”Kir leh chu ka duh a lawm a chhan chu Spain a ni miau a. Club thenkhat nen inbiakna kan nei tawh a, enge thleng zel dawn chu kan hre chho zel ang. Tunah erawh tuna ka dinhmun hi nuam ka ti hle”.

‘Barcelona a kir leh maw?’ ”Aih, ka duh loh thu vawi tam ka sawi tawh. ‘Real Madrid lam maw?’, Real Madrid zawm turin eng vangin nge aih ka tih phal teh lul ang ni. Ka tan chuan duhthlanna ropui tak a ni ang” tiin Deulofeu an Barcelona a kir leh a duh loh thu leh Real Madrid sawmna erawh a hnar loh tur thu a sawichhuak.

Watford leh Barcelona player hlui hian season hmasa khan Serie A club Udinese tan league game 34 a inlan atangin goal 13 leh assist vawi 5 a nei.

Related Posts

error: Content is protected !!